2018年过咗大半，天后郑秀文终于有新歌派台，新歌《千年如一日》由高皓正作曲作词，相信歌迷都等咗好耐喇，不过近日呢首《千年如一日》就卷入抄袭风波。

　　香港音乐人Jim Ling噚日就喺社交网站发文话：「我唔介意呢首歌最后冇搵我编曲，但係点解要抄我个编曲而唔搵我编呢？！」指摘郑秀文新作抄袭，记者搵到佢了解，佢话其实呢首歌早喺2013年高皓正就已经搵咗佢编曲，佢话当日高皓正都有表示将来可能会将首歌卖出去搵歌手唱，最后呢首歌就落咗郑秀文手上。

　　Jim话：「阿正都有同我讲过，首歌搵咗Johnny Yim编曲，但Sammi听完后都想要番本来编曲多啲，佢话佢都有提意Sammi，搵番我修改，但Sammi同Johnny合作开。」Jim话本来佢都唔介意，但近日就发现咗呢首歌嘅编曲，同佢个极为相似，佢又话已经好多行内人听过，都觉得佢可以追讨！

　　Jim话噚日有同东亚A&R同事短讯联络过，表明想追讨番，要加名等等，但对方未有实质回复，只反问咗佢一句：「你係咪决定要咁做」就冇其他回应喇！

　　记者亦搵过Sammi唱片公司东亚，对方回应话：「公司已知悉事件，正了解及处理中！」

　　金培达就喺Jim回应到指，如果高皓正当初同Jim有金钱上嘅协议，技术上高皓正係购买咗个版权。Jim就答係有金钱上嘅协议，但正式推出去都应该要俾知道佢曾经付出过。